Синалко - освежување за македонската одбојка

Љубовта на Тоше Проески кон одбојката беше иницијалната каписла за формирање на одбојкарскиот клуб Синалко од Крушево, сега водечки во македонското првенство и кој има европски амбиции









Тимот на Синалко со Проески во составот

Кога ќе се спомне Крушево, првата асоцијација секако е ненадминливиот Тоше Проески, првата Република на Балканот во 1903-та, потоа спортот. Во овој случај станува збор за одбојкарскиот клуб Синалко, гордоста на крушевчани, кој моментно е на лидерската позиција во Првата лига со реални шанси на крајот да се закити со титулата државен првак. Идеолог и иницијатор за формирање одбојкарски клуб во Крушево во 2007 година беше токму Проески.

- Љубовта на Тоше кон одбојката беше иницијалната каписла за да формираме клуб. Крајната цел беше повторно да заживее одбојката, која во тој период, по згаснувањето на ОК Нико Доага, беше во мирување во нашиот град, а потоа и да се анимираат младите луѓе. Сите добро знаат каков човек беше Тоше, каква харизма поседуваше, беше како магнет за сите во родниот град. Тој беше основачот и првиот капитен на екипата, а друга важна работа беше тоа што нé поврза со неговите пријатели од фирмата „Синалко“, чиј заштитен знак беше токму тој. И сé тргна добро, го формиравме клубот, на 13 октомври 2007-та го одигравме првиот официјален натпревар, против Пробиштип, сите бевме пресреќни, со нетрпение чекавме да почнеме со официјални натпревари. Но три дена подоцна Тоше загина. Бевме шокирани, но си дадовме завет дека ќе ја туркаме работата како што беше договорено. По две години во Втората, влеговме во Првата лига и, еве, годинава сме на најдобар пат да се искачиме на врвот - да станеме шампиони. Што ќе значи тоа за Крушево, каде што одбојката е спорт број 1, не треба да истакнувам. Имаме голема поддршка од градските власти и од неколку други спонзори, „Агенс“, „Макспорт“, „Цеботекс“ - вели Андреј Николовски, претседателот на ОК Синалко.

На спортски план, макотрпната повеќегодишна работа со одбојкарите падна на плеќите на тренерот Пеце Рујановски.

- Екипата е составена главно од одбојкари од Крушево, кои пред неколку години беа втори во Македонија во младинска конкуренција. Во меѓувреме тие стекнаа искуство, напредуваа на секој план, сезонава се засиливме и со неколку квалитетни играчи и, еве, годинава сме блиску до реализацијата на планираното. До крајот на првенството има уште пет кола, ги совладавме најголемите ривали Шкендија (3-1 во Тетово) и Струмица дома (3-2) и верувам дека од првата позиција ќе почнеме во плејофот. Ми се полни душата што одбојката стана хит во Крушево, салата „Војвода Ѓорги Стојанов“, што собира околу 800 луѓе, станува претесна. Нашите амбиции не завршуваат со освојување на шампионска титула. Сакаме да си ја пробаме силата и во некој еврокуп и очекуваме поддршка од спонзорот „Синалко“ и од главните газди во Германија - вели Рујановски.